မန္တလေး၌ ဆောင်းရာသီကာလအတွင်း လာနီညာ အအေးလှိုင်း ဖြတ်သန်းမှုကြောင့် အအေးပိုမည်

၂၀၂၀ခုနှစ်၊ ဆောင်းရာသီ ကာလအတွင်းတွင် လာနီညာ ရာသီဥတု ဖြစ်ပေါ်မှုကြောင့် မန္တလေးအပါအဝင် တိုင်းဒေသကြီးများ၌ အအေးဓာတ်လွန်ကဲမည် ဖြစ်ကြောင်း မိုးလေဝသနှင့် ဇလဗေဒ ညွှန်ကြားမှု ဦးစီးဌာန၏ ကြေညာချက်အရ သိရသည်။ 

အီကွေတာအနီးရှိ အပူပိုင်း ပစိဖိတ်သမုဒ္ဒရာ (Tropical Pacific Ocean) ၏ ပင်လယ်ရေ မျက်နှာပြင် အပူချိန်နှင့် လေထုဖြစ်စဉ်များအရ ဒီဇင်ဘာလအတွင်း အားအသင့်အတင့်ရှိသော လာနီညာ ရာသီဥ အခြေအနေသို့ ရောက်ရှိနေသည် ဖြစ်သည်။ 

နိုင်ငံတကာ မိုးလေဝသ ဌာနများ၏ သင်္ချာပုံစံပြု မော်ဒယ်များ ခန့်မှန်းချက်အရ ဆောင်းရာသီ ကာလများဖြစ်သည့် ဇန်နဝါရီလနှင့် ဖေဖော်ဝါရီလတို့တွင် လက်ရှိရာသီဥတုမှ အားအသင့်အတင့်ရှိသော လာနီညာအဆင့်တွင် ဆက်လက် တည်ရှိနိုင်သည်ဟု ခန့်မှန်းရသည်။

လာနီညာဖြစ်စဉ်သည် ပစိဖိတ်သမုဒ္ဒရာတွင် ဖြစ်လေ့ရှိသော ဖြစ်စဉ်တစ်ခု ဖြစ်သော်လည်း ၎င်းကြောင့် အကျိုးသက်ရောက်မှုမှာ ယေဘုယျအားဖြင့် ဆောင်းရာသီ ကာလအတွင်း အရှေ့မြောက်မုတ်သုံလေ အားကောင်းပြီး မြန်မာနိုင်ငံ ရာသီဥတုအပေါ် များစွာ အကျိုးသက်ရောက်မှု ရှိကြောင်း သိရသည်။ 

ဖော်ပြပါ လာနီညာ ရာသီဥတု ဖြစ်စဉ်ကြောင့် မြန်မာနိုင်ငံရှိ ဒေသအနှံ့အပြား၌ ညအပူချိန်များ လျော့နည်းခြင်း၊ အအေးပိုခြင်း၊ အရှေ့ဘက်မှ လေပွေလှိုင်းများ တိုက်ခတ်ခြင်း၊ အချိန်အခါမဟုတ် မိုးရွာသွန်းမှုများ ပိုမိုဖြစ်ပေါ်လာနိုင်ခြင်း စသည်တို့ ဖြစ်ပေါ်နိုင်သည်။ 

အဆိုပါ လာနီညာရာသီဥတု ဖြစ်ပေါ်မှုနှင့် ပတ်သက်သည့် သတင်း အခြေအနေများအား အချိန်နှင့် တစ်ပြေးညီ ဆက်လက်ထုတ်ပြန် ပေးပို့သွားမည် ဖြစ်ကြောင်း မိုးလေဝသနှင့် ဇလဗေဒ ညွှန်ကြားမှု ဦးစီးဌာန၏ လှုမှုကွန်ရက် စာမျက်နှာတွင် ထုတ်ပြန်ကြေညာချက်အရ သိရသည်။