အိန္ဒိယမှ ကိုရိုနာဗိုင်းရပ်စ် ရှိမရှိ (၁)နာရီအတွင်း စစ်ဆေးနိုင်မည့် စက္ကူတစ်မျိုးအား တီထွင်ရောင်းချ

အိန္ဒိယနိုင်ငံတွင် ကိုရိုနာ ဗိုင်းရပ်စ်ပိုး ရှိမရှိ အမြန်ဆုံး စစ်ဆေး အတည်ပြုနိုင်မည့် စက္ကူတစ်မျိုးကို အမြန်ဆုံး အသုံးပြုနိုင်ရန် ဆောင်ရွက်လျက် ရှိကြောင်း AFP သတင်းအရ သိရသည်။ 

ထိုစက္ကူသည် ဗိုင်းရပ်စ် ရှိမရှိ အတည်ပြုချိန် (၁) နာရီခန့်သာ ကြာမြင့်မည် ဖြစ်ပြီး လက်ရှိ ကမ္ဘာပေါ်တွင် အသုံးပြုလျက်ရှိသော စစ်ဆေး ကိရိယာများထက် ပိုမိုတိကျသည့် အဖြေကို ရရှိနိုင်မည် ဖြစ်သည်ဟု ဆိုသည်။

ဗိုင်းရပ်စ်ပိုး စစ်ဆေးမည့် စက္ကူသည် အမျိုးသမီးများ ကိုယ်ဝန် ရှိ၊ မရှိ စမ်းသပ်သည့် စက္ကူမျိုး ဖြစ်ပြီး ဈေးနှုန်းမှာလည်း အထူသက်သာကာ အသုံးပြုရ လွယ်ကူကြောင်း သိရသည်။ 

နယူးဒေလီမြို့ရှိ IGIB သုတေသန ဌာနမှ ပူးတွဲတီတွင်သူ တစ်ဦးဖြစ်သည့် ဆူဗစ် မိုင်တီက ထိုစက္ကူအား စမ်းသပ် အသုံးပြုရာတွင် ရှုပ်ထွေးသော စက်ကိရိယာများ မလိုအပ်သလို ကျွမ်းကျင်စရာလည်း မလိုအပ်ကြောင်း ပြောကြားခဲ့သည်။

ထို့ပြင် နိုင်ငံများရှိ ဝေးလံပြီး ဖွံ့ဖြိုးမှု နည်းပါးသည့် ဒေသများ၊ ဓါတ်ခွဲခန်း မရှိသည့် အရပ်ဒေသများတွင် ထိုစက္ကူကို လွယ်ကူစွာ၊ ငွေကြေး အကုန်အကျ နည်းပါးစွာ အသုံးပြု နိုင်မည် ဖြစ်ကြောင်းလည်း ပြောကြားသည်။ 

ထိုစက္ကူဖြင့် ဗိုင်းရပ်စ်ပိုး စစ်ဆေးရန် ကုန်ကျငွေမှာ ရူပီး (၅၀၀) သို့မဟုတ် အမေရိကန် ဒေါ်လာ (၆.၇၅) (မြန်မာငွေ ၉,၀၀၀ ကျပ် ပတ်ဝန်းကျင်) သာ ကျသင့်မှာ ဖြစ်ပြီး စက္ကူ၏ အမည်ကို ဖလူးဒါဟု ခေါ်တွင်ကြောင်း သိရသည်။ 

ဖလူးဒါကဲ့သို့သော Antigen Kit များအား ကမ္ဘာပေါ်တစ်ဝန်းရှိ ဖွံဖြိုးပြီး နိုင်ငံအချိ့တွင်လည်း စမ်းသပ် ထုတ်လုပ်လျက် ရှိကြပြီး ဖလူးဒါကဲ့သို့ပင် ဗိုင်းရပ်စ်အား အလွယ်တကူ စစ်ဆေးနိုင်ကြောင်း သိရသည်။    

ထိုစက္ကူအား အိန္ဒိယနိုင်ငံ အစိုးရမှ တရားဝင် ဖြန့်ချီခွင့် ပြုထားပြီ ဖြစ်ပြီး တာတာ ကုမ္ပဏီမှ နိုင်ငံတစ်ဝန်းသို့ မကြာမီ ကာလအတွင်း ဖြန့်ချီသွားမည် ဖြစ်သည်။ 

လက်ရှိ အိန္ဒိယနိုင်ငံတွင် ကိုရိုနာ ဗိုင်းရပ်စ်ပိုး တွေ့ရှိသူ (၇.၅) သန်းကျော်သွားပြီ ဖြစ်ပြီး  နိုင်ငံတစ်ဝန်းရှိ စမ်းသပ်ခန်း ၁,၂၀၀ ကျော်တွင်  Antigen Kit နည်းဖြင့် နမူနာတို့ဖတ် ယူကာ စစ်ဆေးသည့် PCR နည်းတို့ကို အသုံးပြုပြီး  လူဦးရေ ၁ သန်းအား ရောဂါပိုး စမ်းသပ်ပေးလျက် ရှိကြောင်း သိရသည်။ 

Ref : AFP