ရန်ကုန်-မန္တလေး အမြန်လမ်းမကြီးတွင် သွားလာရန် ကျန်းမာရေး ထောက်ခံချက်ပါရှိရမည်

ရန်ကုန်-မန္တလေး အမြန်လမ်းကြီးတွင် အောက်တိုဘာလ (၁၃) ရက်နေ့မှ စတင်၍ သွားလာရန် အတွက် COVID-19 ရောဂါ မရှိကြောင်း ထောက်ခံချက် ပါရှိရမည် ဖြစ်ကြောင်း ကြေညာထားသည်။ 

အောက်တိုဘာ (၁၃) နံနက် (၆) နာရီအချိန်မှ စတင်၍ အမြန်လမ်းမကြီး မိုင်တိုင် (၀/၅) နှင့် (၀/၆)အကြား ရန်ကုန် - မန္တလေးသွားလမ်း၌ ရန်ကုန်တိုင်းဒေသကြီးအစိုးရအဖွဲ့၏ အစီအမံဖြင့် စစ်ဆေးမည် ဖြစ်ကြောင်း ကြေညာထားခဲ့သည်။ 

မန္တလေးတိုင်းဒေသကြီး အတွင်းမှ ဖြစ်စေ၊ ရန်ကုန်တိုင်းဒေသကြီး နယ်မြေအတွင်းမှ ဖြစ်စေ။ အမြန်လမ်းမကြီးပေါ်သို့ တက်ရောက်လာသည့် ကုန်တင်ယာဉ်၊ ခရီးသည်တင်ယာဉ်နှင့် အိမ်စီးကိုယ်ပိုင်ယာဉ်များအားလုံးမှ ယာဉ်မောင်း၊ ယာဉ်နောက်လိုက်နှင့် ယာဉ်ပေါ်ပါသူအားလုံး COVID-19 ရောဂါပိုးမရှိကြောင်း ထောက်ခံစာပါရှိခြင်း ရှိ/မရှိ စစ်ဆေးသွားမည် ဖြစ်ပါသည်။ 

ထို့အပြင် ထောက်ခံစာပါရှိသူများကို ဆက်လက် သွားလာစေမည်ဖြစ် သည့်အပြင် ထောက်ခံစာမပါရှိသည့် ယာဉ်မောင်း၊ ယာဉ်နောက်လိုက်နှင့် ယာဉ်ပေါ်ပါရှိသူများအား ကျန်းမာရေးဝန်ထမ်းများ၏ စစ်ဆေးမှုခံယူပြီး COVID-19 ရောဂါပိုးမရှိကြောင်း စစ်ဆေးတွေ့ရှိမှသာ ထောက်ခံချက်ပေးပြီး ဆက်လက်သွားလာစေမည် ဖြစ်ပါသည်။ 

ထိုကဲ့သို့ ကြေညာချက်များနှင့် သတိပေးချက်များကို သိရှိစေရန်အတွက် လိုအပ်သည်များကို ကြိုတင်ပြင်ဆင် ဆောင်ရွက်နိုင်စေရန် အသိပေးဖော်ပြချက်ထုတ်ပြန်ထားမှုသတင်းကို ဖော်ပြအပ်ပါသည်။

Ref: အမြန်လမ်းမကြီးရဲတပ်ဖွဲ့မှူးရုံး