မန္တလေးတိုင်းသို့ ဝင်ရောက်ရန် တစ်ရက်လျှင်ပျှမ်းမျှ ယာဉ်အစီး (၁၀၀) ခန့်ကို မတ္တရာမြို့တွင် ဆေးစစ်

မန္တလေးတိုင်းဒေသကြီးအတွင်း ကုန်တင်ယာဉ်များ ကုန်တင် ကုန်ချလိုပါက ယာဉ်မောင်းနှင့် ယာဉ်နောက်လိုက်များ အနေဖြင့် ကိုဗစ်ကင်းစင်ကြောင်း ထောက်ခံချက်ပါရှိရမည် ဖြစ်ကြောင်း အောက်တိုဘာ (၂) ရက်နေ့က ကြေညာပြီး ဖြစ်သည်။ 

COVID-19 ရောဂါပိုး ကူးစက်ပြန့်ပွားမှု မရှိစေရေးအတွက် မန္တလေးတိုင်းအတွင်းသို့ စစ်ကိုင်းတိုင်းဒေသကြီးမှ ဝင်ရောက်လာသည့် ကုန်တင်ယာဉ်များတွင် ပါဝင်သော ယာဉ်မောင်းများနှင့် ယာဉ်နောက်လိုက်များကို  ပြင်ဦးလွင်ခရိုင် မတ္တရာမြို့ရှိ စစ်ဆေးရေးစခန်းတွင်  Test Kit  ဖြင့် ရောဂါပိုး ရှိ မရှိကို အောက်တိုဘာလ (၇) ရက်နေ့မှ စတင် ဆောင်ရွတ်လျက်ရှိသည်။ 
 
အဆိုပါ Test Kit   ဖြင့်  COVID-19 ရောဂါပိုး ရှိ မရှိ စစ်ဆေးရာတွင် မတ္တရာမြို့နယ် ရောဂါကာကွယ် ထိန်းချုပ်ရေးနှင့် အရေးပေါ်တုံ့ပြန်ရေးကော်မတီတို့မှ ဦးဆောင်၍ စစ်ဆေး ဆောင်ရွက်လျက် နေသည်။ 

မန္တလေး မြို့တွင်းသို့ ဖြတ်သန်းဝင်ရောက်မည့် ယာဉ်များမှ တစ်ရက်လျှင် ပျှမ်းမျှအားဖြင့် အစီးရေ စုစုပေါင်း (၁၀၀) ခန့်ရှိနေသည်။ အောက်တိုဘာလ (၇) ရက်နေ့တွင် မန္တလေးတိုင်း အတွင်းသို့ ဝင်ရောက်ရန် ကုန်တင်ယာဉ် အစီး (၁၁၀) မှ ယာဉ်မောင်းနှင့် ယာဉ်နောက်လိုက် (၁၇၅) ဦး အား ကျန်းမာရေးဝန်ထမ်းများဖြင့် စစ်ဆေးပေးခဲ့သည်။ 
 
ထို့သို့  စစ်ဆေးရေးစခန်း၌  ပူးပေါင်းအဖွဲ့ဖြင့် ဆောင် ရွက်ရာတွင် မတ္တရာမြို့နယ် ကိုဗစ် ၁၉ ထိန်းချုပ်ရေးနှင့် အရေးပေါ်တုံ့ပြန်ရေးကော်မတီဥက္ကဋ္ဌ အပါအဝင် သက်ဆိုင်ရာ တာဝန်ရှိသူများက ပူးပေါင်း ဆောင်ရွက်ခဲ့ကြကြောင်း သိရသည်။