မန္တလေး ပုဂ္ဂလိကဆေးရုံမှ စေသနာ့ဝန်ထမ်း ဆရာဝန်နှင့်သူနာပြုများ ရန်ကုန်သို့ ရောက်ရှိ

မန္တလေးတိုင်းဒေသကြီးမှ COVID-19 ရောဂါ ကုသရေး လုပ်ငန်းများတွင် ပူးပေါင်းကူညီဆောင်ရွက်ရန် မြန်မာနိုင်ငံ ပုဂ္ဂလိကဆေးရုံများအသင်း (Myanmar Private Hospitals’ Association) ကိုယ်စားပြု ဆရာဝန်များနှင့် သူနာပြုများ အောက်တိုဘာ ( ၂ ) ရက်နေ့က ရန်ကုန်မြို့သို့ ထွက်ခွာခဲ့ကြသည်။

ကျန်းမာရေးနှင့် အားကစားဝန်ကြီးဌာနနှင့် ပူးပေါင်း၍ COVID-19 ရောဂါ ကုသရေး လုပ်ငန်းများတွင် ပူးပေါင်းကူညီဆောင်ရွက်ရန် မန္တလေးမြို့ရှိ ပုဂ္ဂလိကဆေးရုံများဖြစ်သော  

• ငြိမ်းဆေးရုံ၊ 
• ကံ့ကော်ဆေးရုံ၊ 
• အာရောဂျံဆေးရုံ၊ 
• ပန်းလှိုင်ဆေးရုံ၊ 
• မန္တလာဆေးရုံ၊ 
• မြတ်တော်ဝင်ဆေးရုံ၊  
• မြို့တော်ဆေးရုံနှင့် 
• Grand Mandalay ဆေးရုံတို့မှ စေတနာ့ဝန်ထမ်း ဆရာဝန်နှင့် သူနာပြုများပါဝင်ခဲ့သည်။ 

ဆရာဝန်များနှင့် သူနာပြုများသည် အောက်တိုဘာလ (၂) ရက်နေ့  နံနက် (၇) နာရီက မဟာအောင်မြေမြို့နယ်၊ သိပ္ပံလမ်းရှိ မြို့တော်ဆေးရုံစုရပ်မှတစ်ဆင့် ရန်ကုန်မြို့သို့ ထွက်ခွာခဲ့ကြသည်။

အဆိုပါ စေနာ့ဝန်ထမ်း ဆရာဝန်၊ သူနာပြုများအား မန္တလေးတိုင်းဒေသကြီး ဝန်ကြီးချုပ် ဒေါက်တာဇော်မြင့်မောင်၊  မန္တလေးတိုင်းဒေသကြီး ကုသရေးနှင့် ပြည်သူ့ကျန်းမာရေးဦးစီးမှူး ဒုတိယညွှန်ကြားရေးမှူးချုပ် ဒေါက်တာသန်းသန်းမြင့်၊  ဆေးတက္ကသိုလ် (မန္တလေး) ပါမောက္ခချုပ် ပါမောက္ခ ဒေါက်တာခင်မောင်လွင်နှင့် မြန်မာနိုင်ငံ ပုဂ္ဂလိကဆေးရုံများအသင်း (မန္တလေး)မှ ဆေးရုံအုပ်ကြီးများက ဂုဏ်ပြု၍ ပို့ဆောင်နှုတ်ဆက်ကြသည်။

မြန်မာတစ်နိုင်ငံလုံးတွင် ယခုအခါ မတ်လ (၂၃) ရက်နေ့မှ အောက်တိုဘာလ (၂) ရက်နေ့ အထိ COVID-19 ဓာတ်ခွဲအတည်ပြုလူနာ စုစုပေါင်း (၈,၃၄၄,) ဦးရှိပြီး ဆေးရုံဆင်းခွင့်ရသူ (၂,၃၈၁) ဦး ရှိပြီ  ဖြစ်ကာ သေဆုံးလူနာ (၁၅၀) ဦး ရှိပြီ ဖြစ်သည်။