မန္တလေးတိုင်းရှိ ဘုရား၊ စေတီပုထိုးများအား ပြန်လည် ဖွင့်လှစ်ခွင့် ပြုဦးမည်မဟုတ်

By Thant 

မန္တလေးတိုင်းဒေသကြီးအတွင်း ခရိုင်၊ မြို့နယ်၊ မြို့၊ ရပ်ကွက်နှင့် ကျေးရွာများရှိ တန်ခိုးကြီးဘုရားများ၊ စေတီပုထိုးများ ဖူးမျှော်ခြင်းအား ခွင့်မပြုသေးကြောင်း စက်တင်ဘာလ (၁) ရက်နေ့က မန္တလေးတိုင်းဒေသကြီး အစိုးရမှ ထုတ်ပြန်ခဲ့သည်။ 

စေတီပုထိုးတော်များနှင့် ဘုရားများအား COVID-19 ကာကွယ်၊ ထိန်းချုပ်၊ ကုသရေးအမျိုးသားအဆင့် ဗဟိုကော်မတီထံမှ ခွင့်ပြုချက်ရရှိမှသာ ပြန်လည်ဖွင့်လှစ်ခွင့် ပြုသွားမည် ဖြစ်ပါသည်။ ယခု ထုတ်ပြန်ထားသော လမ်းညွှန်ချက်များ၊ တားမြစ်ကန့်သတ်ချက်များကို စက်တင်ဘာလ (၁) ရက်နေ့မှ စတင်၍  လိုက်နာဆောင်ရွက်ပေးရန် ကြေညာထားပြီး ယခင် (၈) လပိုင်း (၂၁) ရက်နေ့က ထုတ်ပြန်ခဲ့သော အသိပေးကြေညာချက်အား အစိုးရမှ ပယ်ဖျက်လိုက်ပြီ ဖြစ်သည်။ 

ထို့အပြင် ပြည်ပနိုင်ငံများမှ ပြန်လည်ရောက်ရှိသူများနှင့် ရောဂါပိုး ကူးစက်ပြန့်ပွားမှု များပြားသည့် မြို့နယ်များမှ ပြန်လည်ရောက်ရှိလာသူများ အားလုံး Community Based Facility Quarantine (၂၁)ရက်နှင့် Home Quarantine (၇)ရက် ထားရှိဆောင်ရွက်သွားရန်ကိုလည်း ထည့်သွင်းကြေညာထားသည်။ 

မန္တလေးတိုင်းဒေသကြီးအတွင်း လူစုလူဝေး ဖြစ်ပေါ်နိုင်သည့် နေရာများနှင့် ပွဲလမ်းသဘင်များ ကျင်းပခွင့်အား ခေတ္တယာယီ ပိတ်သိမ်းထားရန် မန္တလေးတိုင်းဒေသကြီး အစိုးရ၏ ကြေညာချက်တွင် ပါဝင်သည်။ COVID-19 ရောဂါသည် လေထုထဲမှတစ်ဆင့် ကူးဆက်ပြန့်ပွားသော ရောဂါတစ်မျိုး ဖြစ်သောကြောင့် လူစု၊လူ‌ဝေး မဖြစ်စေရန် ပြည်နယ်နှင်တိုင်းဒေသကြီး အစိုးရမှ တာဝန်ယူဆောင်ရွက်နေခြင်း ဖြစ်သည်။ 

အထက်ပါ အကြောင်းအရာများကို လိုက်နာမှု မရှိပါက COVID-19 ကာကွယ်ရေး ဥပဒေအရ အရေးယူ ဆောင်ရွက်သွားမည် ဖြစ်ကြောင်း သတိပေးချက်တွင် ထည့်သွင်း ကြေညာထားပါသည်။