အခန်းပေါင်း (၁၀,၀၀၀) ပါဝင်မည့် အငှားအိမ်ရာစီမံကိန်း မကြာမီ တည်ဆောက်မည်

by Win May May Htay

ပြီးခဲ့သော စက်တင်ဘာလ (၇) ရက်၊ မွန်းလွဲ ၁နာရီတွင် ပြည်သူ့အငှားအိမ်ရာ (Public Rental Housing) တည်ဆောက်ရေး စီမံကိန်း ဦးစီးကော်မတီသည် အငှားအိမ်ရာ (၁၀,၀၀၀) စတင် အကောင်အထည် ဖော်နိုင်ရေးအတွက် လုပ်ငန်းညှိနှိုင်း အစည်းအဝေးကို နေပြည်တော်၌ ကျင်းပ ပြုလုပ်ခဲ့သည်။

ထိုအစည်းအဝေးကို ဆောက်လုပ်ရေးဝန်ကြီးဌာန၊ အစည်းအဝေး ခန်းမဆောင်၌ ပြုလုပ်ခဲ့ခြင်း ဖြစ်ပြီး Video Conferencing စနစ်ဖြင့် အစည်းအဝေးကို ပြုလုပ်ခဲ့ကြခြင်း ဖြစ်သည်။ ယင်းလုပ်ငန်းညှိနှိုင်း အစည်းအဝေးသို့ ...

• ပြည်ထောင်စုဝန်ကြီး ဦးဟန်ဇော်၊
• ဒုတိယဝန်ကြီး ဒေါက်တာ ကျော်လင်း၊
• အမြဲတမ်းအတွင်းဝန်၊ မြို့ပြနှင့်အိမ်ရာ
• ဖွံ့ဖြိုးရေး ဦးစီးဌာန ညွှန်ကြားရေးမှူးချုပ်နှင့် တာဝန်ရှိသူများ၊
• နေပြည်တော်ကောင်စီဝင် ဦးတင်ထွန်း၊
• ရန်ကုန်တိုင်းဒေသကြီး စက်မှု၊ လက်မှုနှင့် လမ်းပန်း ဆက်သွယ်ရေး ဝန်ကြီး ဒေါ်နီလာကျော်၊
• မန္တလေးတိုင်းဒေသကြီး လျှပ်စစ်၊ စွမ်းအင်နှင့် ဆောက်လုပ်ရေးဝန်ကြီး ဦးဇာနည်အောင်၊
• ပုဂ္ဂလိက လုပ်ငန်းရှင် အသင်းချုပ် (၃) ခု

စသည်တို့မှ ဥက္ကဋ္ဌများက Video Conferencing ဖြင့် ချိတ်ဆက်တက်ရောက်ခဲ့သည်။

ထိုအစည်းအဝေးသည် အိမ်ရာစီမံကိန်းများကို စတင် အကောင်အထည်ဖော် ဆောင်ရွက်နိုင်ရန်နှင့် စာချုပ်ချူပ်ဆိုခြင်းများအား အတည်ပြုနိုင်ရန် ညှိနှိုင်းဆွေးနွေးသည့် အစည်းအဝေး ဖြစ်ပြီး စာချုပ်များကိုလည်း သက်ဆိုင်ရာ အဖွဲ့အစည်းများသို့ ပေးအပ်ထားပြီး ဖြစ်ကြောင်း ဒုတိယဝန်ကြီး ဒေါက်တာကျော်လင်း၏ ပြောကြားချက်အရ သိရသည်။

ထို့ပြင် အိမ်ရာစီမံကိန်း လုပ်ငန်းများ ဆောင်ရွက်နိုင်ရေးအတွက် ရန်ပုံငွေများကိုလည်း ဘဏ္ဍာရေး စည်းမျဉ်း စည်းကမ်းများနှင့်အညီ သက်ဆိုင်ရာ အဖွဲ့အစည်းများသို့ ခွဲဝေပေးသွားမည် ဖြစ်ပြီး၊ COVID-19 ကာလ ဖြစ်သည့်အတွက် စီမံကိန်း စတင် အကောင်အထည်ဖော် ဆောင်ရွက်ရာတွင် ကျန်းမာရေးနှင့် အားကစားဝန်ကြီးဌာနတို့၏ ညွှန်ကြားချက်များအတိုင်း အတိအကျ လိုက်နာဆောင်ရွက်သွားမည် ဖြစ်ကြောင်းလည်း သိရသည်။

ပြည်သူ့အငှားအိမ်ရာ စီမံကိန်းလုပ်ငန်းများအား အကောင်အထည်ဖော် ဆောင်ရွက်ခြင်းအားဖြင့် ပြည်သူအများ နေထိုင်ရေးအတွက် အဆင်ပြေစေရန် ရည်ရွယ်သည့်အပြင် အလုပ်အကိုင် အခွင့်အလမ်းများလည်း တိုးပွား ရရှိလာရန် ရည်ရွယ်ထားခြင်း ဖြစ်သည်။

Source : moi.gov.mm