မန္တလေးစျေးချို ဇန်နဝါရီ(၁၃)ရက်မှာ ပြန်ဖွင့်နိုင်ရန်စာတင်မည်

ကိုဗစ်ကြောင့် စက်တင်ဘာ(၁၃)ရက်ကတည်းက ပိတ်ထားရတဲ့ မန္တလေးမြို့ အဆင့်မြင့်ဈေးချိုကို ဇန်နဝါရီ(၁၃)ရက်မှာ ပြန်လည်ဖွင့်လှစ်နိုင်ဖို့ စီစဉ်နေပြီး စျေးချို ပြန်ဖွင့်ခွင့်ပြုဖို့ ဈေးအကျိုးတော်ဆောင် ကော်မတီက မန္တလေးတိုင်းဒေသကြီး အစိုးရအဖွဲ့ထံ စာတင်မှာဖြစ်တယ်လို့ ဈေးအကျိုးတော်ဆောင်အဖွဲ့ တာဝန်ရှိသူက ပြောပါတယ်။ 

အထက်မြန်မာနိုင်ငံရဲ့ အကြီးဆုံးစျေးကြီးလို့ ဆိုနိုင်တဲ့ မန္တလေး ဈေးချိုတော်ကို အမြန်ဆုံး ပြန်လည် ဖွင့်လှစ်ပေးစေချင်တယ်လို့ မန္တလေး အဆင့်မြင့် ဈေးချိုတော်နှင့် အဆင့်မြင့် တိုက်တန်းကြီး ဈေးအကျိုးတော်ဆောင် အတွင်းရေးမှူး ဦးမျိုးမင်းထွန်းက ပြောပါတယ်။

မန္တလေး ဈေးချိုတော်ကို ပြန်လည်ဖွင့်လှစ်ခွင့်ပြုဖို့ ပြီးခဲ့တဲ့ တန်ဆောင်မုန်းလတုန်းကလည်း တိုင်းဒေသကြီး အစိုးရအဖွဲ့ကို တင်ပြခဲ့ပေမယ့် ပြည်ထောင်စု အစိုးရထံ တင်ပြသွားမယ်လို့သာ အကြောင်းပြန်ခဲ့ပြီး ထူးခြားမှု မရှိတဲ့အတွက် ယခုအခါ စာတင်ပြီး ဈေးချိုတော် ပြန်ဖွင့်ခွင့်ရဖို့ လုပ်ဆောင်နေကြတာ ဖြစ်ပါတယ်။

မန္တလေး အဆင့်မြင့်ဈေးချိုတော်ကို COVID-19 ကြောင့် ၂၀၂၀ ခုနှစ် မတ်လ (၂၉) ရက်ကနေ မေလ (၂၁) ရက်အထိ ပိတ်ထားခဲ့ပါတယ်။ မေလ (၂၂) ရက်နေ့မှာ COVID-19 ကြိုတင်ကာကွယ်ထိန်းချုပ်နိုင်ရေး လမ်းညွှန်ချက်တွေနဲ့အညီ ပြန်လည်ဖွင့်လှစ်ခဲ့ပါတယ်။ ဒါပေမယ့် စက်တင်ဘာလအတွင်းမှာတော့ မန္တလေး ခရိုင်အတွင်း COVID-19 ကူးစက်မှုတွေ ပြန်လည်မြင့်တက်လာတဲ့အတွက် ဈေးချိုတော်ကို ပြန်ပိတ်ထားခဲ့ရပါတယ်။

မန္တလေး အဆင့်မြင့်ဈေးချိုတော်ဟာ မန္တလေးမြို့ရဲ့ အထင်ကရဈေးတစ်ခုဖြစ်ပြီး ဈေးရုံ (၈) ရုံနဲ့ ဆိုင်ခန်းပေါင်း (၃၂၀၀) ကျော်ရှိပါတယ်။