မန္တလေးခရိုင်အတွင်း Lockdown အစီအစဉ်အား ယနေ့မှစ၍ ပယ်ဖျက်ကြောင်း ကြေညာ

COVID-19 ကူးစက်ရောဂါ ထိန်းချုပ်ကာကွယ်နိုင်ရေးအတွက် ဒီဇင်ဘာလ (၅)ရက်နေ့က ထုတ်ပြန်ခဲ့သော Semi-lockdown တားမြစ်ကန့်သတ်မိန့်များကို မန္တလေးတိုင်း ဒေသကြီး အစိုးရအဖွဲ့မှ ဒီဇင်ဘာလ (၁၉)ရက်နေ့မှစကာ ပြန်လည် ပယ်ဖျက်လိုက်ကြောင်း သိရသည်။ 

COVID-19 ကာကွယ်ထိန်းချုပ် ကုသရေးဆိုင်ရာများနှင့် ပတ်သက်၍ မန္တလေးတိုင်းဒေသကြီး အစိုးရက ပြည်သူသို့ တင်ပြခြင်း ဆိုသည့် ကြေညာချက်အရ မန္တလေးခရိုင်အတွင်း သတ်မှတ်ထားသည့် Stay At Home ဆောင်ရွက်ခြင်း လုပ်ငန်းစဉ်များနှင့် ဒဏ်တပ်ခြင်း များကို ဆက်လက် ဆောင်ရွက်တော့မည် မဟုတ်ကြောင်း ဖော်ပြထားသည်။ 

သို့ရာတွင် ရောဂါ ကူးစက်မှုနှုန်းမှာ လျော့ကျသွားခြင်း မရှိသောကြောင့် ပြည်သူအများ အနေဖြင့် ကျန်းမာရေးနှင့် အားကစား ဝန်ကြီးဌာနက ထုတ်ပြန်ထားသော လမ်းညွှန်ချက်များအတိုင်း စနစ်တကျ နေထိုင်သွားကြရန် ပန်ကြားထားကြောင်း သိရသည်။ 

ပြီးခဲ့သည့် ဒီဇင်ဘာ (၅)ရက်နေ့မှ (၁၇)ရက်နေ့အတွင်း စည်းကမ်း မလိုက်နာသူများကို ဒဏ်တပ်ခြင်းများ ဆောင်ရွက်ခဲ့ရာ ဒဏ်ရိုက်ခံရသူ (၁၃,၂၀၀)ကျော်၊ ဒဏ်ကြေးငွေ စုစုပေါင်း ကျပ်သိန်း (၆၆၀)ကျော် ရရှိခဲ့ကြောင်း ကြေညာစာအရ သိရသည်။

အဆိုပါ ဒဏ်ကြေးငွေများကို မန္တလေးခရိုင်အတွင်းနေ အများပြည်သူအတွက် ပြန်လည်အသုံးပြုမည် ဖြစ်ကြောင်းကိုလည်း မန္တလေး တိုင်းအစိုးရ၏ ထုတ်ပြန်ချက်တွင် ဖော်ပြထားပြီး ဒီဇင်ဘာ (၁၇)ရက်အထိ မန္တလေးခရိုင်အတွင်း COVID-19 အတည်ပြုလူနာ (၈,၄၆၉)ဦး ရှိကာ ၎င်းတို့အနက် ဆေးရုံဆင်းသူ (၅,၉၄၃)ဦး၊ သေဆုံးသူ (၁၁၅)ဦးနှင့် ဆေးရုံတက်ရောက်နေဆဲ (၂,၄၁၁)ဦး ရှိကြောင်း သိရသည်။

မန္တလေး တစ်တိုင်းလုံးအနေဖြင့် အတည်ပြုလူနာ (၁၀,၄၃၃)ဦး ရှိကာ ၄င်းတို့အနက် ဆေးရုံမှဆင်းသူ (၇,၃၂၅)ဦး၊ သေဆုံးသူ(၁၄၁)ဦးနှင့် ဆေးရုံတက်နေဆဲ(၂,၉၆၇)ဦး ရှိကြောင်း မန္တလေးတိုင်းဒေသကြီး COVID-19 ထိန်းချုပ်ရေးနှင့် အရေးပေါ်တုန့်ပြန်ရေး ကော်မတီမှ သတင်းထုတ်ပြန်ထားသည်။

Source from MOHS, MOI, Mandalay Indepth News