Friday, 03 April 2020 12:48

KT_TW_03_006-001.jpg

 

ဒီတစ်ခါမှာတော့ ကဗျာ ၊ စာပေချစ်သူ ပရိသတ်တွေအတွက် ကဗျာဆရာ ကြီး Rudyard Kipling ရဲ့ On the road to Mandalay ကဗျာလေးရဲ့ နောက်ကွယ် မှ မိုင်တွေ မိန်းမောဖွယ်နောက်ကြောင်း‌လေးများကို ဖော်ပြပေးသွားမှာပဲ ဖြစ်ပါတယ်။

 “ မော်လမြိုင် ဘုရားဟောင်းကြီးကနေ အရှေ့ဘက်ပင်လယ်ပြင်ကို မြင်ကြည့်မယ်ဆိုရင် အဲ့မှာ မြန်မာ မလေး တစ်ယောက်ရှိတယ်ဗျ ကျွန်တော် သိတယ် သူမ ကျွန်တော် ကို စောင့်နေမယ်ဆိုတာကိုပေါ့ ထန်းပင်ရဲ့ ထန်းလတ် လေးတွေကို တိုက်ခတ်တဲ့လေသံတွေ၊ ဘုရားကျောင်းက ခေါင်းလောင်းသံ ဆွေးဆွေးမြေ့မြေ့တွေက ကျွန်တော့်ကို ' ဗြိတိန်စစ်သားလေး မန္တလေး ကိုပြန်လာ' လို့ ပြောနေသလိုပါပဲ "

On the Road to Mandalay ဆိုတဲ့သီချင်းလေးကို ရှေ့မှီနောက်မှီ ဗြိတိန် မှ နိုင်ငံခြားသားတွေနဲ့ မြန်မာ လူမျိုးတော်တော်များ သိကြပါလိမ့်မယ်။

ဒီသီချင်း လေးအကြောင်း ပြောပြရရင် သီချင်းဖြစ်ပေါ်လာပုံကအစပြောပြရမှာပေါ့ရှင် ဒီသီချင်းလေးက Rudyard Kipling ရဲ့ Barrack-Room Ballads နာမည်ဖြင့် ၁၈၉၀ နှစ်များကထွက်ရှိတဲ့ သူ့ကဗျာစာအုပ်မှာ Mandalay ဆိုတဲ့ ကဗျာလေးတစ်ပုဒ်အဖြစ်ပါဝင်ခဲ့တာပါ။

အဆိုပါ ကဗျာဆရာကြီး Kipling ရဲ့ ကဗျာစာအုပ်ထဲမှာ ထို Mandalay ကဗျာအပြင် Gunga Din", "Tommy", နဲ့ "Danny Deever" စတဲ့နာမည်ကျော်ကဗျာတွေပါဝင်ထားတာတွေ့ရပါတယ်။Mandalay ကဗျာက ထူးခြားတယ်ပြောရရင်တော့ ကိုလိုနီခေတ် အချိန်အခါမှာပေါ့ ဗြိတိန် စစ်သားလေးတစ်ဦးက မြန်မာပြည်ကိုလာတယ်။

မြန်မာမလေး တစ်ဦးနဲ့ မေတ္တာမျှတယ်၊ ဒါပေမယ့်လည်း ထို ဗြိတိန်စစ်သားလေးကို တာဝန်ကြီးပြီးလို့ သူ့မြို့သူ့ရွာဖြစ်တဲ့ လန်ဒန်မြို့က ဆင့်ခေါ်တဲ့ အချိန်ကို ရောက်လာခဲ့တယ်။ဗြိတိန်စစ်သားလေးက ရင်ထဲမှာ မချိမဆန့်ခံစားလိုက်ရတယ် သူ့ရဲ့ မြန်မာ အမျိုးသမီး ချစ်သူလေးကို သူထားခဲ့ရတော့မည်ကိုး …

ထိုဗြိတိန်စစ်သားလေးရဲ့အလွမ်းအဆွေးတွေကို ကဗျာဆက်ဆိုထားတာ တွေ့ရတယ်။ သီချင်းထဲက Moulmein ဆိုတာ မော်လမြိုင် ကို ဆိုလိုတာပါ။ ( ဘိုသံထွက်သွားသောကြောင့်ထိုသို့ အသံထွက်ဖြစ်သွားခြင်းသာဖြစ်ပါသည်။ )

Kipling ဟာ သူ့မိတ်ဆွေ နှစ်ဦးဖြစ်တဲ့ အဲလက်စ် နဲ့ တက်စ် အပါအဝင် မီးသဘေ်ာ ဖြင့် ကယ်ကုတာ မှ ဂျပန် သွားခဲ့ပါတယ် ထို လမ်းခရီးမှာ Rangoon ( ရန်ကုန် ) ကတော့ ကယ်ကုတာ ပြီး ပထမ ဆိပ်ကမ်းပေါ့ သို့ပေမဲ့ သူတို့ဟာ ရန်ကုန်ပြီးတော့ မော်လမြိုင်မှာ အစီအစဉ်မရှိပဲ ရပ်ခဲ့ရပါတယ်။

ကဗျာဆရာ Kipling ဒီကဗျာလေးကိုရေးနေတဲ့အချိန်မှာ သူ့အသက်က ၂၄ နှစ်ပဲရှိအုံးမယ် ဒါ့ထက် တိုက်ဆိုင်တာ ၁၈၉၀ ခုနှစ်ရဲ့ အခုလို မတ်လ နဲ့ ဧပြီလ အချိန် မှာပဲ ကဗျာရေးသူက မော်လမြိုင် ကနေပြီးရေးသားဖြစ်ခဲ့တာတဲ့။အနုပညာသမားဆိုပြန်တော့လဲ မန်းရွှေမြို့တော်ကြီးကို စိတ်က ရည်ရွယ်ပြီး ရေးရှာတယ်ထင်ပါတယ်။

အံမယ် မြန်မာ အမျိုးသမီးလေးတွေရဲ့ အလှကလည်း ထိုစဉ် Kipling ရင်ထဲထိ လှိုက်ဖိုအောင် ဖမ်းစားနိုင်သတဲ့။ကဗျာဆရာ က မြန်မာ အမျိုးသမီးလေးတွေရဲ့ မက်မွန်သီးရောင် ( ရွှေညိုဖျော့ရောင် ) အသားအရေနဲ့ ကိုယ်လုံး ကိုယ်ဖန်တောင့်တောင့် ကိုစွဲလန်းခဲ့တာပါတဲ့။ထိုခေတ် ထိုအခါက ဥရောပ သားတွေ အတော်လေး မြန်မာအမျိုးသမီး မိန်းမပျိုလေးတွေကို သဘောကျခဲ့ပါသတဲ့။

ထို Kipling ရဲ့ ကဗျာလေးကို အမေရိကန်သီချင်းရေးဆရာ Oley Speaks က ကဗျာမှ သီချင်းအဖြစ် ပြန်လည် သီကုံးခဲ့ပါတယ်။ On the road to Mandalay ကို သီဆိုခဲ့တဲ့ သူတွေထဲမှာ Peter Dawson , Frankie Laine နဲ့ Frank Sinatra တို့က ထင်ရှားပါတယ်။

Frankie Laine သီဆိုထားတဲ့ version က အနည်းငယ် မြန်ပါတယ်။Peter Dawson ရဲ့ version ကတော့ လုံးဝ classic ပါ။Frank Sinatra ရဲ့ version က ဆိုရင်တော့ လူကြီးလူငယ်မရွှေးနားဝင်ကာ နားနှင့်တည့်ပါလိမ့်မည်။

PS : Rudyard Kipling က Sanfrancisco ကို မသွားခင် ရန်ကုန်မြို့မှာရှိတဲ့ Pegu club အဆောက်အဦးမှာ နေသွားသေးပါသတဲ့။

Shin Min Bo


Read 425 times Last modified on Friday, 03 April 2020 12:52
Rate :
(1 Vote)

Related items

Leave a comment

Make sure you enter the (*) required information where indicated. HTML code is not allowed.