ကိုဗစ်ရောဂါပိုးလျော့ကျလာ၍ မန္တလေးမြို့ရှိ ကွာရန်တင်းစင်တာအချို့ပိတ်သိမ်း

မန္တလေးမြို့တွင် COVID-19 ရောဂါ အတည်ပြုလူနာ စစ်ဆေးတွေ့ရှိမှု လျော့ကျလာပြီး ပိုးတွေ့လူနာနှင့် ထိစပ်သူ အရေအတွက် လျော့ကျလာသည့်အတွက် ကွာရန်တင်း စင်တာအချို့ စတင် ပိတ်သိမ်းနေပြီ ဖြစ်သည်။

စိန်ပန်းရပ်ကွက် (၄၁)လမ်းပေါ်ရှိ အထက (၂၄) ကွာရန်တင်း စင်တာကို ဇန်နဝါရီ(၉)ရက်မှ စတင်ကာ ယာယီ ပိတ်သိမ်းလိုက်ကြောင်း၊ ထို့အပြင် ချမ်းအေးသာစံမြို့နယ် TTC (မန္တလေး ပညာရေးကောလိပ်) ကွာရန်တင်းစင်တာရှိ ခုတင် (၁၅၀)ဆံ့ အမျိုးသမီး အဆောင် ကွာရန်တင်း စင်တာတစ်ခုကိုလည်း ဇန်နဝါရီ (၇)ရက်မှ စတင်ကာ ယာယီပိတ်သိမ်းထားကြောင်း သိရှိရသည်။

မဟာအောင်မြေမြို့နယ်အတွင်း ယခင်က တစ်ရက်လျှင် အတည်ပြုလူနာ (၄၀)ဝန်းကျင်နှင့် ပိုးတွေ့လူနာနှင့် ထိတွေ့ဆက်စပ်သဖြင့် ကွာရန်တင်း ထားရှိရသူ (၇၀) ဝန်းကျင်အထိ ရှိခဲ့ရာမှ ယခုရက်ပိုင်းတွင်မူ တစ်ရက်လျှင် ပိုးတွေ့သူ (၁၀) ဦးဝန်းကျင်နှင့် ထိတွေ့ဆက်စပ်သူ (၂၀) ဝန်းကျင်သာ ရှိတော့သည်။

မဟာအောင်မြေမြို့နယ် ကဲ့သို့ပင် ချမ်းအေးသာစံမြို့နယ်တွင်လည်း TTC (မန္တလေး ပညာရေးကောလိပ်)  ကွာရန်တင်း စင်တာရှိ ခုတင်(၁၅၀)ဆံ့ အမျိုးသမီး အဆောင်တစ်ခုကို ဇန်နဝါရီ(၇)ရက်မှ စတင်ကာ ယာယီပိတ်သိမ်းထားပြီး အမရပူရမြို့နယ်တွင်လည်း အတည်ပြုလူနာ စစ်ဆေးတွေ့ရှိမှုနှင့် ထိစပ်သူ လျော့နည်းလာသဖြင့် ရတနာပုံတက္ကသိုလ် ကွာရန်တင်းစင်တာကို ဇန်နဝါရီ (၁၃)ရက်တွင် ယာယီပိတ်သိမ်းရန် စီစဉ်နေပြီဖြစ်သည်။

မန္တလေးခရိုင်အတွင်း Facility ကွာရန်တင်းစင်တာ (၁၃)ခုနှင့် ဟိုတယ်ကွာရန်တင်းစင်တာ (၁၁)ခု ရှိပြီး တစ်တိုင်းလုံး အနေဖြင့်မူ Facility ကွာရန်တင်းစင်တာ (၂၄၁)ခုနှင့် ဟိုတယ်ကွာရန်တင်းစင်တာ (၂၁)ခု ရှိသည်။