COVID-19 ကာလအတွင်း ဝင်ငွေအကာအကွယ် ပေးနိုင်သည့် အာမခံကို ထပ်မံဝန်ဆောင်မှု ပေးမည့် KBZMS

အထွေထွေ အာမခံကုမ္ပဏီ (KBZMS) က ၎င်းတို့တွင် ကျန်းမာရေးအာမခံ ထားရှိသူ Customer အားလုံးအတွက် ထပ်တိုး ဝန်ဆောင်မှု တစ်ခုဖြစ်သည့် COVID-19 ဝင်ငွေ အကာအကွယ်ကို စတင်ဝယ်ယူနိုင်ပြီ ဖြစ်ကြောင်း  သတင်းထုတ်ပြန် ကြေညာချက်အရ သိရသည်။ 

ထိုဝန်ဆောင်မှုအား ယနေ့ ၂၀၂၀ခုနှစ်၊ ဒီဇင်ဘာလ (၁၄) ရက်နေ့မှ ၂၀၂၁ ခုနှစ်၊ မတ်လ (၁၃) ရက်နေ့အတွင်း ရောင်းချပေးသွားမည် ဖြစ်ပြီး အာရောဂျံ ကျန်းမာရေးအာမခံ ဝယ်ယူမည့် Customer တိုင်းအတွက် ထပ်ဆောင်း ဝန်ဆောင်မှုအဖြစ် ပေးအပ်သွားမည်ဟု သိရသည်။

အာရောဂျံ ကျန်းမာရေး အာမခံ ဝယ်ယူသူများ အနေဖြင့် Facility Quarantine သို့ သွားရောက် နေထိုင်ရမည့် အခြေအနေ သို့မဟုတ် ဆေးရုံ တက်ရောက်ရမည့် အခြေအနေဖြင့် တွေ့ကြုံခဲ့ရပါက ငွေကြေးအာမခံချက် ရရှိနိုင်မည့် ထူးခြားသော နှစ်ကြာဝင်ငွေ အကာအကွယ်တစ်ခု ဖြစ်သည်ဟု ဆိုသည်။ 

KBZMS သည် မြန်မာနိုင်ငံ၌ COVID-19 အကာအကွယ် အာမခံကို ပေးစွမ်းနေသည့် ပထမဦးဆုံး အာမခံ ကုမ္ပဏီတစ်ခု ဖြစ်ပြီး COVID-19 ပထမလှိုင်း စတင်ချိန်မှ စ၍ ယနေ့အထိ အကျိုးခံစားခွင့် လျော်ကြေးငွေ ပမာဏမှာ မြန်မာငွေကျပ် (၂၁၀) မီလီယံအထိ ပေးလျော်ခဲ့ပြီး ဖြစ်ကြောင်း သိရသည်။ 

ထို့ပြင် ပထမလှိုင်း အပြီးကတည်းက COVID-19 ကူးစက်ခံရမှုကြောင့် ဆေးခန်းပြသခြင်း၊ ဆေးရုံ တက်ရောက်ခြင်းနှင့် သေဆုံးခြင်းများအတွက် အာမခံ အကျိုးခံစားခွင့်များကိုလည်း ပိုမို တိုးမြှင့်ကာ ဝန်ဆောင်မှု ပေးခဲ့ကြောင်းလည်း သိရသည်။ 

လက်ရှိ ဖြစ်ပွားလျက် ရှိသည့် COVID-19 ကပ်ရောဂါ ကာလအတွင်း ကျန်းမာရေး အာမခံ ဝန်ဆောင်မှုများမှာ သိသိသာသာ ရောင်းအား မြင့်တက်လာခဲ့ပြီး ကုမ္ပဏီ၏ ကျန်းမာရေး အာမခံ ပရီမီယံဝင်ငွေသည် လွန်ခဲ့သော နှစ်ကာလများနှင့် ယှဉ်ပါက ၁၄၁၀% အထိ တိုးတက်လာခဲ့ကြောင်း ပြောကြားခဲ့သည်။ 

၂၀၂၀ ခုနှစ်၊ စက်တင်ဘာလတွင် ရရှိခဲ့သည့် အချက်အလက်များအရ ပြီးခဲ့သည့် ဒုတိယ (၆)လအတွင်းတွင် ကျန်းမာရေးအာမခံ အမျိုးအစား၏ ပရီမီယံဝင်ငွေ ရရှိမှုသည် ၁၅၉% အထိ တိုးတက်ခဲ့ပြီး အလုံးစုံ မော်တော်ယာဉ် အာမခံနှင့် မီးအာမခံ ပရီမီယံဝင်ငွေ စုစုပေါင်းမှာမူ ၁၀%အထိ ကျဆင်းခဲ့ကြောင်း သိရပါသည်။